Челядьсянь ветеранъясöдз
Отсавны нывкаяслы да зонкаяслы да налöн бать-мамлы венны сьöкыдлунъяснысö, аддзыны лов пытшкöс вын да öтувтчыны семьяын. Татшöм да мукöд уджалан могыс семьялы да челядьлы социальнöй отсöг сетан юкöнысь психолог Вероника Чалановалöн
Уджалö быд арлыда челядькöд, налöн бать-мамкöд, олöмаяскöд, торъя военнöй операцияö пырöдчысьяслöн матыссаяскöд, семьяö пи либö ныв пыдди либö опека улö босьтысьяскöд, вермытöмъяскöд. Сёрнитö тыр арлыдтöмъяскöд найöс майшöдлан быдтор йылысь, кыдзи кутны асьсö мыжаöн лоöмтор дырйи да кыдзи дорйысьны ёртыдлы паныд сувтiгöн. Отсалö бать-мамлы гöгöрвоны быдтасыслысь сьöлöмкылöмсö, аддзыны öтувъя кыв да лöньöдны ышнясьöмъяссö. Нуöдö асьтö тöдмалан тестъяс, медым быдöн вермис гöгöрвоны асьсö да майшöдлöмъяссö. Уджалö и пикö воöм семьяяскöд, отсалö корсьны сьöкыдлунысь петан туй.
Öлöдан тэчасноглöн службакöд, кытчö пырöны велöдан, бурдöдан, семьялы да челядьлы отсöг сетан, опека юкöнъяс, полицияын уджалысьяс, ставöн, кодъяслöн уджыс кодаркö боксянь йитчöма челядькöд, Вероника Алексеевна ветлö сикт-грездъясö. Видзöдöны-сёрнитöны видзöдлас улö веськалöм челядькöд, бать-мамныскöд, выль семьяö нывкаясöс да зонкаясöс босьтысьяскöд, кежавлöны и семьяясö, кодъяслысь мырддьывлiсны каганысö, да бать-мамыс вежисны-бурмöдiсны оласногсö, бöр босьтiсны быдтассö.
– Олöмаяслöн котыръяс ёнмöдчöны-шойччöны «Гортса санаторийын», корлöны сёрнитны. Ветла олöмаяслы да вермытöмъяслы Югыдъягса, тыр арлыдтöмъяслы социальнöй реабилитация юкöнъясö. Шыöдчöны и торъя военнöй операцияö пырöдчысьяслöн семьяясысь, психологлöн отсöг колö кыдз боечлöн бать-мамыслы, гöтырыслы, сiдз и челядьныслы. Сёрнита и районса администрацияын опека улö босьтысь семьяяслöн чукöртчöм вылын. Унаöн шыöдчöны юкöнö волöмöн. Быдöнлы отсала, – сёрнитiс Вероника Алексеевна.
Психологлöн уджыс – тайö абу сöмын консультацияяс. Сiйö зiльö вöчны быд семьяöс шудаджыкöн, челядьöс – эскыны аслыныс, а бать-мамöс – кужны дорйыны ассьыныс ныв-писö олöмын быд мытшöд дырйи.
Марина Дадашова
Снимок Анастасия Лютоевалöн


Оставьте первый комментарий для "Ноябр 22-öд лун — психологлöн лун"