Шудлуныс ыджыд семьяын
Александр Чаплыгин чужис Носим сиктын Ирина Васильевна да Сергей Васильевич семьяын. Кык вок быдмисны радейтна, öта-мöднысö пыдди пуктана семьяын. Гашкö, сы вöсна и Саша лöсьöдiс ыджыд семья.
Ольга гöтырыскöд тöдмасисны Носимын, кытчö ныв волывлiс пöч ордас. Муслуныд бордъялiс томъясöс, радейтчöм поздысис налöн сьöлöмъясын, öтлаасисны, и öнi Ручын ас керкаын, шуда позйын, нёль челядь нин. Медыджыдыс, Юлия, велöдчö юркарын искусство гимназияын, Роман сизимöд классын. Семён таво пырис медводдза классö, а медичöт Илья котралö садйö. Кыдзи висьталö ачыс Александр, Рома пö менам зэв бур отсасьысь нин. Öтув ветлöны кыйны чери. Оз пö вöлi куж, но таво зэв бура нин велöдчис сынны. И аслыс пö кажитчö. Арыс озыр вöлi, да батя-пиа вель ёна вотiсны да сдайтiсны дона еджыд гоб. Водз асыв пö, муртса вöрзьöдан, и чеччас пырысь-пыр. Романлы пö унджык сюралiс, серавлö батьыс. Орччöн и быдмö, батьыслысь быдторйö велалö Роман.
🏡 И ичöтъясыскöд аддзö кад мыйкö вöчыштны. Менам волiгöн батя-пиа (медiчöтыс) петöны вöлi вердны чипанъясöс. Оз коль отсöгтöг и Ольга гöтырыс. Айлов чукöр вермасны и пöжасьны, чöскыдджыка на пö артмö налöн, ошкис мамныс.
Чаплыгинъяслöн ыджыд семьятöг некыдз культура керкаын мунысь быдсикас мероприятие. Ставныс волöны и спорт туйвизьын нуöданторъяс вылö, сьöлöмсяньныс пырöдчöны став ворсöмас. Челядьыскöд тшöтш и батьныс котралö. Ветлывлам пö походъясö, «Мишкин лес» шойччаiнö. Тулысын ставöн пуктысьöны, вöчöны градъяс да лöсьöдöны клумбаяс. Видзöны чипанъясöс да кроликъясöс. И танi вердчигöн орччöн ныв-пиян.
Александр уджалö Дереваннöйса лесничествоын лесникöн, гöтырыс школаын завхозöн. Öтув идралiсны град выв пуктас, и аслас машинаöн сёр арöдз ветлöдлiсны вöрö вöтчыны.
👍Мед эськö унджык татшöм семьяыс, кöнi пыдди пуктöны öта-мöднысö бать-мам, ыджыд тöждаöсь асланыс быдтасъяс вöсна, на вылö видзöдöмöн челядьыс быдмöны шаньöсь, зiльöсь да тöлкаöсь, оз вунöдны и Олялысь неылын олысь бать-мамсö, пыр жö öтув накöд и уджын, и гажъяс дырйи.
Матыстчö батьлы сиöм лун. Чолöмала Александрöс и став батьяссö тайö мича праздникнас. Лоöй шудаöсь, дзоньвидзаöсь да мед быд семьяын вöлi тыр-бур да лада олöм.
Екатерина Ульнырова
Снимокъяс Чаплыгинъяслöн чукöртöмысь
Оставьте первый комментарий для "Октябр коймöд вöскресенньöö пасъям батьлысь лун"