Октябрлöн коймöд вöскресенньöö пасъям туй овмöсын уджалысьяслысь лун

Сиктъяскостса и вöрса туйяс

«Оптималес» котыр вöр лэдзöм, пилитöм кындзи могмöдö овмöдчöминъяскостса туйяс. Павел Минаков тайö ыджыд овмöсас медводз зiлис пилорама вылын, но окота лоис вежны уджсö. Сыктывкарын курсъяс вылын велöдчис автогрейдерса машинистö, сьöмнас отсыштiс котырöн веськöдлысь Николай Шебырев. Öд сиктъяс костын туйяс кындзи пыр колiс лöсьöдны-шыльöдны и вöр кыскалан туйяс, да татшöм специалистыд пыр колана.

Павел Викторович Дiасёръяысь. 2000-2002-öд воясын служитiс Чечня республикалöн Ханкала карын мотопехота войскаын. Сiйö тыш-косьса ветеран. Армия бöрын уджыштiс Микуньын, а сэсся бергöдчис чужанiнас.
И со витöд во Павел Викторович автогрейдер вылын. Зэръяс, вöр кыскалан да груз новлан мукöд машинаяслöн ветлöм вöсна му туйясыд ёна тшыксьöны. Гожöмын найöс дзоньталöны, шыльöдöны. А тöлын мужичöй лымйысь весалö Дiасёръя-Помöсдiн, Сордйыв-Помöсдiн, Бадьёльйыв-Помöсдiн туй костъяс, кöнi ветлöны школаса автобусъяс, тшöтш и Помöсдiн сиктын овмöдчöминса туй юкöнъяс. Ёна лымъялiгöн отсöгöн локтö «Оптималеслöн» жö ныра Камаз машина. Ёна кöдздöдöмöн лöсьöдöны Югыдтыдорö тöвся туй. Медводз мунö гусеница трактор, бöрас кыскö, йöз пöвстын кö, утюг. Сiйö бура шыльöдö, шыльыда жö и кынмö. А сэсся лымйысь весалö туй тшыксьытöдз. Павел Минаковлöн сойборд улас и Дiасёръя сайсянь Пöдтыбок дорö асфальта туйöдз веськыд туй, кытi тöвнас петкöдöны вöр. Гöгöрвоана, техникатö ёна уджöдiгöн пыр колö дзоньталыштны, кыткö да зэлöдыштны, мед сiйö пыр вöлi дась. Ачыс и вöчасьö.

Уджалiгöн овлiс, мый туй вылö петавлöны быдсикас звер-пöткаыс. Став аддзылöмсö мужичöй снимайтö аслас телефонöн. Öтчыд ош сувтiс туй вуджигöн, техникасö сувтöдiс и Павел Викторович. Тракторыд гора шыа, да пышйис ваткыльыд. И таръяс шысьыс жбырнитöны-лэбзьöны. Тэрыб кöчьяс быттьö ордйысьöны, панйöны надзöн мунысь техникатö. Пашкыр бöжа ручьясыд кылöны да ылiсянь нин пышйöны.

Марина Дадашова
Снимок Алексей Минаковлöн