Кыпыд ловкылöмöн, бур сьöлöмöн

Садйын быд уджалысь – артист, серпасасьысь, быдтор вылö мастер!

Пуктö подув тöдöмлунъяслы, воськов бöрся воськов «нуöдö» школаö.

Кулöмдiнса öтиöд номера садйын зiльö кык чой, Елена Сидоренко да Виктория Потапова.

Елена Николаевна Кулöмдiнса шöр школаын велöдчöм бöрын пырис уджавны нёльöд номера садйö кага видзысьлы отсасьысьöн. Сэки и гöгöрвоис, мый олöмсö йитас челядькöд да уджысь орöдчывтöг велöдчис воспитательö. Уджалö нин 32 во.

Эз кольччы челядькöд уджысь и Виктория Николаевна. Кöть эськö велöдчис пусьысьö, но челядьöс быдтöм-велöдöм лоис сылöн могöн. Тшöтш пырис педучилищеö. Садйын уджалö 13 во. Таво медводдзаысь на сылöн школаöдзса арлыда челядь лоисны кадетъясöн. Пажынöдз нывкаяс да зонкаяс олöны садса корöмъяс серти. Лунся шойччöм-узьöм бöрын тöдмасьöны-пырöдчöны кадетъяслöн олöмö. Пасьталöны канпаса футболкаяс, велöдчöны торксьытöг восьлавны да сувтны радö. Вын-эбöс песöны «Олимпик» ёнмöдчанiнын, сёрнитöны кадетъяслöн могъяс йылысь. Ветлiсны сынöдсянь вöр видзан да кусöдчан юкöнö. Тöдмасисны пилотъяскöд да парашютöн чеччалысьяскöд. Видзöдлiсны самолётлысь пытшкöссö да весиг пуксьылiсны кабинаас. На дорö волiсны и туйвывса инспекторъяс. Сёрнитiсны правилöяс йылысь, тöдмасисны сирена да гора сёрнитан оборудованиеöн.

– Видзöдöм серти, челядь тöдчымöн лоисны дисциплинаö кутчысьысьöн. Сюся кывзöны корöмсö да вöчöны торкавтöг. Занятиеяс вылын отсасьöны öта-мöдныслы, тöждысьöны матыссаяс вöсна, –висьталiс Виктория Николаевна.

Елена да Виктория занятиеяс нуöдöны интереснöя да аслыспöлöса. Öтуввезйысь босьтöны выль тöдöмлунъяс, пыр кыпöдöны сям. Куим во сайын Виктория Потапова районса конкурсын лоис медбур воспитательяс лыдын. Бур уджысь аньяслы вичмылiсны почёт грамота да аттьöалана гижöд.

Татьяна Чувьюрова
Снимок гижысьлöн