Арся каникулъяс дырйи районса 109 велöдчысь эз сöмын шойччы, но и босьтiсны медводдза уджалан сям, тöдмасисны профессияяскöд да ветлiсны видзöдлыны предприятиеяслысь быд лунся уджсö.
Татшöм позянлун збыльмöдiсны «Йöзöс уджöн могмöдан шöрин» республикаса учреждениелöн Кулöмдiнса юкöн, велöдан управление да школаясын веськöдлысьяс öтув сёрнитчöмöн «Кадры» национальнöй бала серти, кодöс вöзйис Россияса президент Владимир Путин.
Юкöнса специалистъяс отсалісны ныв-зонлы гижны колана кабалаяс, гöгöрвоöдісны налысь уджалан инöдъяссö, висьталiсны удж сикасъяс, уджаланног да сыысь мынтысян ног йылысь. Уджöн могмöдiсны меставывса школаяс.
– Зiльны позьö 14 арöссянь 18-öдз. Медуна велöдчысь вöлi Югыдъягса да Кулöмдінса шöр школаясын – 20-ан, Зимстансаын – 12, Кебанъёльса, Помöсдінса, Пожöгдінса, Немдінсаын – 10, Вочсаын – 9 да Тимшерсаын – 8 морт. Тайö сетö позянлун томуловöс могмöдны оз сöмын уджöн, но и тöдмöдны уджсикасъясöн. Гырысь класса нывка да зонкаяслы регыд ковмас бöрйыны аскиа профессия. Паськыдджыка висьтавны уджсикасъяс йылысь – миян мог, – пасйис «Йöзöс уджöн могмöдан шöрин» республикаса учреждениелöн Кулöмдiнса юкöнысь удж сетысьяслы государствосянь отсöг сетан да уджöн могмöдан мераяс юкöнса начальник Наталья Липина.
Челядь куртiсны школалысь йöр, чукöртiсны лöп-ёг, мыськалiсны школаысь стенъяс, парта-улöсъяс да шкапъяс. Кулöмдiнса школаысь велöдчысьяс уджалöм кындзи ветлiсны «КомиИнвестПром» акционер котырö. Тöдмасисны вöр пилитан öнія технологияясöн, видзöдiсны, кыдзи вöчöны тьöс-плака. Сёрнитiсны сэтчöс специалистъяскöд, юасисны кутшöм профессияяс торйöн нин коланаöсь тайö туйвизьын. Немдiнсаяс весалiсны-лöсьöдiсны шойна вылысь Великöй Отечественнöй война вылö ветлысь салдатлысь гусö, библиотекаын дзоньталiсны небöгъяс. Кебанъёльса нывкаяс да зонкаяс отсасисны школаса лабораторияын да музейын. Вöчисны быдса стенд.
Кор аскиа том войтыр аддзöны талунъя удж да гöгöрвоöны, кутшöм специалистъяс колöны тайö либö мукöд предриятие-организацияын, профессия йылысь тöдöмлуныс артмö паськыдджыкöн. Тайö тöдчана и аслыныс челядьлы, и котыръясöн веськöдлысьяслы, кодъяс виччысьöны удж вылö колана специалистъясöс.
– Зэв бур, мый челядьлöн эм позянлун аслыныс нажöвитны сьöм, öттшöтш отсасьны школаын. Накöд нуöдсьö и туйдан-велöдан уджъяс, кöнi нывъяс да зонъяс босьтöны аслыныс медколанасö – лоны кывкутысьöн да зiльöн. Пуктöны ас водзаныс стöч могъяс, – кывкöрталiс Кебанъёльса школаын директорöс воспитательнöй удж кузя вежысь Аида Исрафилова.
Татьяна Чувьюрова
Снимокъяс Кулöмдiнса юкöнлöн да Немдiнса школалöн
Оставьте первый комментарий для "Медводдза нажöтка"